Досега во мојот живот можам да кажам дека многу сум била естетски, финансиски, но и емотивно изгорена (болка, незадоволство) од салоните за убавина. Во овој блог објаснувам како дојдов до оваа приказна и како ги открив точните мерки за правење на шеќерен восок во домашни услови, без хаос, фрустрации од згрешен восок и два главни начини на употреба.. останете до крај ако сакате и вие да си го олесните животот.
Од кога знам за себе, имам проблем со кожата од сувост и алергија на било какви преработени восоци, до тоа да при било какво триење, зачешување или штипнување имам огромно чешање кое не застанува дури ниту по 15 минути. Да живееш со ваква кожа, не е воопшто лесно, бидејќи си соочен со постојана иритација, безразлика дали е тоа од облека, обично туширање или промена на средина, време и околности како летување на море и слично.
Од сите овие причини, долги години сум истражувала што ми одговара, што не, па затоа како единствено решение за да одбегнам “страдање“ беше шеќерната депилација, бидејќи после секоја друга депилација јас одвај се враќав до мојот дом од неподносливо чешање и црвенила кои траеја понекогаш и по неколку часа. Шеќерната депилација беше спас за мене, бидејќи тоа беше, и е единствен восок од кој јас немам толкаво чешање и ако некогаш врз основа на временските услови кожата ми реагира - сепак брзо ми поминува. НО, не само тоа! - Од шеќерната депилација целосно се изретчуваат и омекнуваат влакненцата, што значи тоа не е маркетинг лага, туку жива вистина.
ИСКУСТВА И ИСКУШЕНИЈА ЗА ПРАВЕЊЕ ВОСОК
Од причина што никогаш воопшто не сум сакала да посетувам салони или луѓе кои ги прават овие услуги како еден голем интроверт, некомуникативна личност за правење муабети низ тој процес со индивидуите кои ми ја правеле оваа услуга, некако потвесно, при секој момент кога ќе требаше да одам некаде, само се чувствував фрустрирано и со отпор, што ми влијаеше многу негативно. Од друга страна, иако шеќерната депилација НЕЗНАМ ЗАШТО одсекогаш била ПРЕСКАПА, но заради маката сум ги давала парите, сепак последниве години таа достигна цени до ПЛАФОН, како и се друго нели, затоа некако беше круцијален момент да прекинам да посетувам салони за убавина или луѓе во домашни услови и заради сите овие причини, но и заради духовни причини (за мене важни).
Па да не должам многу, сакав да ви ја раскажам мојата животна приказна на ова поле, за да ви дадам до знаење дека некој искусил, пробал многу нешта и на своја кожа почувствувал негативен, но и позитивен бенефит. Е сега, кога сме кај правењето на восокот на почеток за мене тој процес беше МАЧЕЊЕ! Додека човек нели, не проба неколку пати или не се изгори неколку пати, нема да научи, па и детето за да прооди претходно мора да паѓа, така е и со се што правиме прв пат.
Искушението доаѓа до ПОГОДУВАЊЕТО НА ТОЧНАТА МЕРКА, НИШТО ДРУГО. Значи најважно е да се погоди точната мерка на состојките, а останатото е лесно, па денеска ќе умеете да научите да направите точно употреблив восок, без губење на живци и шеќер.
РЕЦЕПТ И МЕТОД НА ПОДГОТОВКА:
Јас тука ќе ви оставам 2 рецепти (слични), но за две различни количини и употреби, едниот како восок за правење шеќерно топче за пазуви и лице т.е. надусници (за оној којшто долго време прави депилација на пазуви, не би ви препорачала сами да го правите ова доколку долго време користите бричење под пазуви, бидејќи може да не успеете или да направите беља). Вториот ќе биде рецепт со помека паста за цели нозе со препони со користење домашни крпи (исечени како ленти за депилација - долу во галеријата можете да ги погледнете сите слики за тоа како треба да изгледаат).
1 РЕЦЕПТ: ШЕЌЕРНА ПАСТА ЗА ПРАВЕЊЕ ТОПЧЕ
Топчето се прави од земање една мала количина восок колку мало гумено топче и за истото да се направи, треба претходно восокот да биде малку загреан, но не премногу. Откако ќе го земеме восокот во рака, тој ќе биде многу леплив, но, почнуваме кружно да вртиме, вртиме кружни движења со прстите со него додека не стане една непроѕирна, жолто златна боја и со тоа самиот восок ќе почне повеќе да не се лепи онака како што сме го земале, туку да се создава во лепливо топче - кое дланката ќе може да годржи без проблем и лепење на другите прсти. Тоа изгледа отприлика вака:
Но, за да се постигне ова топче потребни се многу ПРЕЦИЗНИ чекори на подготовка кои ќе го направат идеално, затоа што овој восок знае да се направи и потечен, но и погуст но за користење на друг начин, па нема да може со истиот тој начин да го постигнете топчето. Топчето е многу важно ако сакаме да депилираме препони и пазуви, затоа што е помалку болно, побрзо и поолеснително за вадење на влакната.
Состојки за 1/2 CUP шеќер или во превод за 100гр шеќер:
• 1/2 cup бел обичен шеќер (100гр)
• 1 голема обична лажица + 1 мала лажичка лимонов сок (претходно исцеден лимон)
• 1 + 1/2 (една-ипол) мала лажичка вода.
Начин на подготовка:
1. Во мало ѓезве го ставаме шеќерот, лимоновиот сок и водата.
2. Загреваме на средна температура (5ка-6ка), мешаме додека шеќерот не се стопи целосно, а лажицата не ја вадиме туку останува во ѓезвето (важно зашто не смее да има гранули шеќер на лажицата ако ја извадиме, па потоа пак ја враќаме).
3. Оставаме да врие и откако ќе почне да пени, ја намалуваме температурата на 2ка - 3ка. Вариме без време, оставаме додека смесата не добие златна (килибарна) боја, а како ќе знаеме дека е готова?
4. Кога ќе почне да добива златеста боја (како сончогледов зејтин) ќе ја тестираме густината со земање малку со лажиче од сместата на течноста и ќе ставиме многу малку една капка во ладна вода во посебна бела здела за да можеме да видиме – ако смесата се распаѓа, значи пастата е премногу мека и не е готова, но ако се прави одма во вид на крукче или топче и кога ќе го допреме во водата со прст одма се стврднува, тоа значи дека пастата може да ја завршуваме, односно готова е. За секој случај оставете ја уште некоја минута две пред да ја тргнете од рингла на тивко, не можете да погрешите. Важно е да се прави во топче при допир со ладна вода.
5. Истурете ја во некоја пластична кантичка (подебела за да не ви се стопи од топлото) и оставете ја да се излади доволно за да можете да ја месите со прсти да не се изгорите. Еве мој пример како тоа изгледа:
Ова количество ќе ви биде доволно за тестирање или депилација на помали зони (на пример, надусници, некои помали делови од телото или за двете пазуви), а дури и ќе ви остане за следен пат.
*** ДОКОЛКУ САКАТЕ ПОВЕЌЕ ВОСОК, САМО ДУПЛИРАЈТЕ ЈА ДОЗАТА И ЌЕ ИМАТЕ ЗА ЦЕЛИ НОЗЕ (наместо 100гр шеќер = 200гр, наместо една мала лажичка лимон = 2 и вода три мали лажички итн).
2 РЕЦЕПТ: ШЕЌЕРЕН ВОСОК ЗА ДЕПИЛАЦИЈА НА НОЗЕ ДО ПРЕПОН СО ДОМАШНИ СТАРИ КРПИ (БЕЗ ТОПЧЕ)
Овој метод е МНОГУ полесен од аспект на тоа да не се замарате дали ќе го погодите топчето, бидејќи вака или онака, восокот ќе ви биде ТОЧЕН.. се разбира и тука важи истото правило, само доколку ги погодите точно мерките со состојки.. Овој восок, би требало да биде малку потемен, нешто како темен мед:
За овој метод, количината е малку поголема и слободно стигнува за цели нозе, бидејќи за разлика од топчето, овој восок малку повеќе црпи заради задржување на восок на крпчињата и брзо менување со ново.
Состојки (истата оваа доза од состојки, можете да ја дуплирате за повеќе восок):
1 CUP ИЛИ 200гр обичен бел шеќер
1 мало пакетче (цело) ЛИМОНТУС (суви гранули од +/- 10гр го има секаде да се купи).
3 големи обични супени лажици до максимум 3ипол вода, значи оваа количина треба да биде доволна за да го покрие целиот шеќер и лимонтус, без да додавате повеќе да плива - НАПОМЕНА ЗАТОА ШТО НЕМА ДА ВИ УСПЕЕ РЕЦЕПТОТ.
Подготовка:
Во поголемо ѓезве или мало тенџерче го ставаме шеќерот, лимонтусот и водата.
2. Загреваме на средна температура (5ка-6ка), мешаме додека шеќерот не се стопи целосно, а лажицата не ја вадиме туку останува во ѓезвето (важно зашто не смее да има гранули шеќер на лажицата ако ја извадиме, па потоа пак ја враќаме).
3. Оставаме да врие и откако ќе почне да пени, ја намалуваме температурата на 2ка - 3ка. Вариме без време, оставаме додека смесата не добие темно златна боја како шумски мед.
4. Кога ќе почне да добива темно медова златеста боја (не светла како претходниот рецепт, туку потемна) - го тргаме ѓезвето/тенџерето, ја претураме смесата во дебела пластична мала кутија од павлака или слично и оставаме да се излади, но не да се стврдне.
ОВОЈ ЧЕКОР Е ВАЖЕН: Овој восок се користи кога е потопол, за разлика од другиот кога е поладен, затоа што за овој восок користиме лажица за нанесување на кожата и треба да се нанесе идеално, да биде топол за да ја омекне кожата и крпата убаво да се залепи. Но, проверете на кожата претходно, да не биде премногу врел и да се изгорите.
ДРУГ ВАЖЕН МОМЕНТ: За нанесување на кожата користиме обична супена лажица, црпиме како да црпиме малку “еурокрем“ и од ДОЛЕ НАГОРЕ НАНЕСУВАМЕ НА (да речеме) НОГАТА, значи во должина од стапало кон глава (спротивен раст на влакната), но не само тоа туку и нанесуваме ТЕНОК СЛОЈ, значи да не биде премногу дебел, крпата нема да има ефект, само ќе се залепи за восокот.
Друг важен момент е КРПАТА ДА НЕ СЕ КОРИСТИ ПРЕМНОГУ, максимум 2-4 различни места или повторувања, бидејќи со секој слој се нанесува повеќе восок и така крпата станува повеќе неупотреблива.
ШТО ДА ПРАВИТЕ СО ИСКОРИСТЕНИТЕ КРПИ: Откако ќе ја искористите крпата, на страна имајте кофа наполнета со прашокче и топла вода и во неа секоја употребена крпа ја ставате да кисне. Откако ќе завршите, кофата ќе биде полна со крпи и залепени влакненца, но не се секирајте, оставете ја покриена неколку часа, влакната и восокот во врелата вода самите ќе паднат.
КАКО ДА ГО РЕУПОТРЕБИТЕ ВЕЌЕ СТВРДНАТИОТ ПРЕТХОДЕН ВОСОК?
Следниот пат за да го искористите стариот восок, потребно е да наполните мало тенџере со вода, во него да ставите крпа и над неа да ја ставите пластичната опаковка со стврднатиот шеќерен восок, оставате на тивко водата да се стопли до вриење и чекате додека восокот не омекне готов за повторна употреба.
ЧИСТЕЊЕ НА КРПИТЕ: Откако ќе отстојат крпите во водата, ќе зимате една по една крпа од вода и под чешма со млак млаз топла вода ќе ги доисчистите. Не е ова премногу работа, сигурно ќе имате околу 10тина до 30 крпи во зависност од колкава површина сте депилирале. Малку процесот на чистење е досаден, но да не заборавиме дека предностите се многу поголеми:
Заштедени +1500 денари.
Одма сте дома и можете одма да се истуширате и да бидете чисти.
Никој не ве брза за ништо и знаете дека сте раат цел месец, со заштеден бензин, дополнителни трошоци, енергија и контакти со луѓе.
Па на прашањето ДАЛИ ВРЕДИ погледнете го ова видео: https://www.youtube.com/watch?v=yhHZuCyEMV0
+ ВРЕДИ, затоа што првично сите сме биле ПРЕДОДРЕДЕНИ да ги правиме овие нешта сами, затоа што тоа е природна потреба која жената може да ја направи сама. Во минатото можеби жените си помагале едни помеѓу други за најинтимниот дел, меѓутоа според мене, природата не создала со заштитни влакна на тој најинтимен дел СО ПРИЧИНА заради заштита од бактерии и вируси, па не гледам зашто истите целосно би ги ваделе.. а за депилација на препони, секој може сам, ако не со шеќерно топче, барем со крпа.. или нека ја повика својата најдобра пријателка за помош. Ако ова не е опција за вас, тогаш барем можете да отидете на депилација само за вашиот најинтимен дел, во секој случај ќе заштедите пари, енергија и живци :P.
Се надевам дека овие рецепти ќе ви бидат од помош, па доколку сакате споделете ги на некоја ваша пријателка, роднина или друга блиска личност ако сметате дека ќе им помогне.
Со среќа и лесно!
Comments