Емоционално недостапен партнер

Емоционално недостапен партнер по дефиниција објаснет е човек (маж/жена) кој не е отворен за:

- емоција

- подлабок однос

- комуникација

- интимност во смисла на оголување на себе пред другиот, не само низ водење љубов, туку и низ внатрешните чувства, личност и воопшто емоции и перцепции за светот, себе и личниот внатрешен живот.

Партнерите емоционално може да бидат недостапни поради две причини:

1. Свесен избор да се биде емоционално недостапен (можеби приоритет му е работата во овој момент, работи на исцелување на себе, се бара себеси како идентитет, работи на поврзаноста со Бога и др.).

2. Несвесно емоционално затворање заради причини како влечење на минатото во сегашниот момент, лоши искуства со дрога, алкохол, агресија, лоши семејни услови од кои не е целосно одвоен, родители кои премногу му/ѝ се мешаат и слично.

Сите овие нешта може да влијаат на свесното или несвесното оддалечување од љубовните односи и посериозни врски.

Како да разграничите ваков љубов однос и како да бидете на чисто?

Потребно е да процените дали оваа личност јасно ви дава знаци дека нема приоритет за подлабок однос. Ако партнерот (ова важи и за маж и за жена) нема интерес за вашиот приватен живот, секојдневие, обострано јавување, пишување и почесто гледање, тогаш овој партнер очигледно има поважни обврски отколку потенцијален љубовен партнер во неговиот живот. Во ваквите примери индивидуата треба да проникне зашто привлекува ваков тип на луѓе и дали можеби таа или тој потсвесно очајно бара и исчекува некој да дојде во животот. Ако е тоа така, тогаш оваа личност треба да почне да работи на духовниот развој и довербата во Бога, бидејќи кога човекот се потпира на Бог, тогаш се потпира и на довербата во Него за неговиот љубовен и интимен живот.

Доколку пак сте веќе во ваков недефиниран однос, неопходно е да разговарате и да ја замолите другата личност да отвори чисти карти пред вас и да прашате какви очекувања има тој/таа од овој однос.

Ако молчите и очекувате дека нешто ќе му/и текне... тогаш сте во голема заблуда, бидејќи ако сте во состојба на чекање од другата страна, тогаш тоа не е однос, тоа е зависнички порив на чекање љубов од другата страна. Здрав однос се потпира на обостран отворен пристап на комуникација и разрешување на интимните конфликти, а не исчекување на другиот да му текне да се отвори за вашата комуникација и врска.

Од друга страна, ако оваа личност свесно ви каже дека не сака продлабочен однос, а вие сакате, ако не го прекинете овој однос неизбежно се доведувате себеси во страдање кога тогаш, потсвесно очекувајќи дека нешто ќе се промени. Дури и да прифатите ваков однос, и ја затскриете оваа желба, по некое време нештата ќе излезат од контрола затоа што не можеме да живееме контрадикторно со нашите внатрешни емоции, душа, но и она што Бог го бара од нас, а тоа е самопочитувањето.

Од трета страна, доколку оваа личност е емоционално недостапна, сака продлабочен однос, но вели дека е таков/таква, дека не искажува емоции, не возвраќа многу или некоја друга причина, имајте на ум дека прифаќањето на ваквиот тип на личност ќе ве доведе до кога-тогашно страдање затоа што Бог нѐ создал за да се сакаме отворено и срдечно, а не потајно и оддалечено.

Ниту еден човек не може да издржи во однос кој е едностран. Не може едната чаша постојано да се полни, а другата да останува празна бидејќи ќе дојде до големи внатрешни емоционални страдања, фрустрација и кога-тогаш (изливи на) караници за ситници поради внатрешни неисполнети емоции во односот.

Целата идеја на љубовните односи е луѓето да станат едни со други независно комплетни и исполнети, со духовна чистота и верба, за да може тие духовни вредности да си ги дадат еден со друг, бидејќи без љубовта, искреноста, почитта и заемната доверба во Бога, ниту еден однос не може да ја достигне вистинската кулминација на среќа и благодет.

Во Послание до Римјаните Бог вели: Со својата братска љубов сакајте се срдечно едни со други; натпреварувајте се во почитувањето еден кон друг. Не должете никому ништо освен да се сакате еден со друг, зашто оној што го љуби ближниот, го исполнува законот. Љубовта не му прави зло на ближниот, љубовта е исполнување на законот.

Многу важна информација да се знае е тоа дека нашата животна енергија не смее да се дава за површни минливи односи, поради тоа што тоа е дел од нашето духовно здравје и чистота. Секој поинаков чекор води кон емоционални трауми, блокади, стравови и немири кои ќе придонесат за дополнителни душевни кризи и страданија.

Вистинска љубов е кога двајцата партнери се независни луѓе со свои исполнети животи и внатрешни емоции, па односот го бираат како едно надополнување на веќе здравиот приватен живот. Љубовта е пред се слобода, прифаќање и почитување. А од друга страна двострано вложување, градење и растење, бидејќи како мостот што го држат стабилно двете страни на копното, така и бракот и врската се одржува со две стабилни личности, инаку ќе се сруши.

Доколку сметате дека овој пост ќе помогне некому, споделете го!